Hvað er jafnaðarstefnan?

Ég var spurður að því um daginn hvað jafnaðarstefnan væri í mínum huga. Ég svaraði eitthvað á þá leið að hún væri um það að huga að þeim sem höllum fæti standa í þjóðfélaginu með tekjujöfnun og fleiru sem ég tíndi til.

Svo fór ég að hugsa málið í raun. Ég var ekki ánægður með svarið sem ég hafði gefið. Og allt í einu kom upp í huga mér það sem mér finnst vera rétta svarið.

Jafnaðarstefnan er kærleiki. Og vel að merkja: kærleiki til manna en ekki hugmynda. Því að kærleikurinn vekur samúð með þeim sem líður illa og með þeim sem misgera öðrum.

En jafnaðarstefnan er ekki kærleikur til einhverra stefnumála. Stefnumálin rúmast innan jafnaðarstefnunnar aðeins í þeim mæli sem þau mótast af kærleikanum til mannanna. Þannig má segja að ýmiss konar "jafnréttismál" eigi illa heima innan jafnaðarstefnunnar, ef þau einkennast af offorsi og yfirgangi gagnvart meðbræðrum okkar. Þannig finnst mér krafa samtaka eins og siðmenntar og annarra slíkra, sem krefjast t. d. vanhelgunar helgidaga, og að meirihlutinn láti alltaf í minni pokann fyrir fámennum minnihlutahópum, sem gala og góla og hafa hátt, eiga takmarkaðan rétt til að telja sig heyra jafnaðarstefnunni til.

Ég hef vissa samúð með þrýstihópum á borð við femínistum, þar sem berið er að reyna að vinna gegn þeirri bábilju að konur séu körlum óæðri, skoðun, sem því miður virðist allt of ríkjandi enn. Ég er hins vegar ekki sammála öllum þeirra hugmyndum um úrlausnir. Ég held að við verðum fyrst og fremst að vinna að því að styrkja konur til bættrar sjálfsímyndar. Ég tel að liður í því hljóti að vera að berjast gegn þeirri staðalímynd að stúlkur þurfi að líta svona og svona út, nota þetta og þetta til þess að bæta útlitið, o.s.frv.

Sem betur fer hefur jafnaðarstefnan náð þeim heildareinkennum sem fara mjög hönd í hönd við siðaboðskap kristindómsins um að elska náungann og beita þannig ýmsum jöfnunartækjum, svo sem skattkerfi og bótakerfi, til þess að koma í veg fyrir það böl sem hlýst af fátækt. Sagan sýnir okkur svo ekki verður um villst að án jafnaðarstefnunnar eða einhvers í líkingu hennar verður alltaf of mikil misskipting auðs og lífsgæða. Í þessu efni má benda á þjóðskipulag frumgyðnigdóms eins og sjá má í hluta af lögmáli Gyðinga (2.-5. Mósebækur), þar sem sérstök áhersla er lögð á að hlú að þeim sem höllum fæti stóðu á þeim tíma, ekkjum, munaðarleysingjum og útlendingum. Þessi aðstoð fólst einkum í því að gera þeim kleyft að safna af jarðávexti Gyðinga, þeirra 11 kynkvisla, sem jarðnæði höfðu (12. kynkvíslin átti ekki jarðir og áttu hinar 11 að gjalda tíund þeim til viðurværis).

Hvert er viðmið kærleikans? Jú, það er það sem felst í hinum gullvægu orðum Biblíunnar: Elska skaltu náungann eins og sjálfan þig. Ef jafnaðarstefnan hefur þetta að leiðarljósi, mun henni farnast vel.

Horfin frétt í Mogga

Ég fékk þetta Newsfeed frá Mbl.is á iGoogl síðuna mína:
Skoði hvort Landsvirkjun hafi keypt sér skipulagið
Taka þarf efnislega afstöðu til þess í samgönguráðuneytinu hvort samkomulag Landsvirkjunar við Flóahrepp, um gerð aðalskipulags vegna Urriðafossvirkjunar, standist ákvæði skipulags- og byggingarlaga.

Eins og sést á þessum link, þá virðist búið að taka fréttina út, en textinn sem fylgdi var þessi:

Taka þarf efnislega afstöðu til þess í samgönguráðuneytinu hvort samkomulag Landsvirkjunar við Flóahrepp, um gerð aðalskipulags vegna Urriðafossvirkjunar, standist ákvæði skipulags- og byggingarlaga.

Um hvað var þessi frétt í rauninni? Er á ferðinni rökstuddur grunur um að Landsvirkjun hafi með ólögmætum hætti aflað sér stuðnings við áform um orkuver í Þjórsárvirkjunum eða var þarna á ferðinni eitthvað grín sem óvart datt inn á síðuna?

Hið merkilega minnisblað Seðlabankans

Vísir og Mbl.is birta frétt um minnisblaðið sem Davíð Oddsson minntist á i Kastljósviðtali fyrir nokkrum vikum síðan. Mbl.is gerir "betur" en Visir og vísar á PDF skjal af upprunaskjalinu, en fréttin er hér:
Frétt Moggans um minnisblað Seðlabankans frá í feb. 2008
Skjalið sjálft er hér: Minnisblaðið

Það merkilega er að þetta er mynd af skjalinu, skannað í dag. Uppruni einhver Canon skanni. Engin merking er fyrir Seðlabankann, ekkert logo, ekkert vatnsmerki, ekkert.

Hefði ekki verið trúverðugra að sýna með einhverjum hætti fram á uppruna skjalsins? Þetta vekur ýmsar spurningar.

• Er þetta kannski ástæðan fyrir því að ekki var tekið mark á skjalinu, að það rataði aldrei formlega inn í skjalakerfi eða skjalavistun Seðlabankans?
• Er skjalið úr Seðlabankanum eða er það einhvers staðar annars staðar frá?
• Er rétt dagsetning á skjalinu? Það er nefnilega svo augljóslega hægt að skrifa hvað sem er hvenær sem er og setja á það hvaða dagsetningu sem er.
• Er einhvers staðar í Seðlabankanum að finna skráningu á skjalinu, þar sem hægt er að staðfesta dagsetningu og höfund skjalsins?

Sem sagt, enn á ný dæmi um lélega blaðamennsku. Þetta segir ekkert og sannar ekkert.

Ég er þar með ekki að segja að skjalið sé falsað eða að það sé rangt sem í því stendur, heldur einfaldlega að þessi frétt og snepill sanna mér ekkert og ég vil sannanir. Tími til kominn.

Vísir bætir við:

Og varla hefur Seðlabankinn sjálfur tekið mikið mark á þessu plaggi sínu því mánuði eftir þessa fundi í London ákvað bankinn að afnema bindiskyldu á erlendum dótturfélögum bankanna. Afleiðingin varð að Icesave gat flætt út úr Bretlandi og yfir í mörg önnur lönd eins og t.d. Holland.

Ef skjalið var kannski ekki til er varla von að Seðlabankinn sjálfur hafi tekið mark á því.

An Urgent Message from David Wilkerson

AN URGENT MESSAGE (Click on this link to read)

Sjálfstæðismenn eyða tíma Alþingis

Það er ótrúlegt að hlusta á umræður á Alþingi núna. Áðan voru umræður um fundarstjórn forseta, þar sem Sjálfstæðismenn voru að væla út af því að það ætti nú kannski að ræða eitthvað annað mál en forseti var með í gangi. Þetta var eftir langar málalengingar Sjálfstæðismanna um málið sjálft, um Skyldutryggingu lífeyrissjóða o.fl. Og svo héldu umræðurnar áfram og Sigurður Kári fór að tala um menn og málefni sem ekkert varðaði umræðuna.

Hvernig stendur á því að forseti Alþingis getur ekki skipað mönnum að halda sig við efnið? Ef þessir menn vilja ræða undir ákveðnum lið, þá hlýtur það að vera lágmark að þeir sýni sjálfum sér og Alþingi þá virðingu að ræða það málefni.

Sjálfstæðismenn, endilega kjósið svona kjána í efstu sæti í prófkjörum ykkar, þá kýs enginn flokkinn ykkar.

Sennilega er full þörf á að breyta þingsköpum þannig að forseti hafi meira vald til þess að halda umræðum við málefnin sem til umræðu eru.

Óskrifandi íþróttafréttaritarar

mbl.is: "Aroni hlakkar til að glíma við Lampard"

Mér hlakkar æsla tilsa fá moggann á moggnanna tilsa geta lesi æsla vel skrifar íhrtafréttir.

Brubeck enn að, 89 ára

The Groove Radio á Florida segir frá því að þeir eru styrktaraðilar að konsert Dave Brubecks í Fort Pierce

Vegna breytilegra upplýsinga á The Groove, er rétt að benda líka á þennan tengil:
WGRV The Groove Presents
DAVE BRUBECK
LIVE IN CONCERT
en þar segir reyndar ranglega að hann sé 84 ára. Hann mun vera fæddur 1920, svo að við þurfum að bæta 5 árum við. Brubeck er bókaður fram yfir mitt sumar víða um Bandaríkin og einnig í London og í Torontó í Kanada.

Merkilegt að meðan svo ótalmargir jazzarar hafa látist löngu fyrir aldur fram, þá lifir þessi snillingur í hárri elli og gefur ekkert eftir. En hann hefur reyndar lifað heilbrigðara lífi en flestir jazzarar eins og kunnugt er, enda trúaður kristinn maður, eins og hann hefur oft tekið fram og kemur nokkuð ljóst fram í síðari verkum hans, sjá upplýsingar á heimasíðu Brubecks.

Svona til að skýra tengslin við The Groove, þá fékk ég upplýsingar um þessa útvarpsstöð þegar við Ásta vorum að hlusta á Annie Sellick á Heidi's Jazz Club á Cocoa Beach á Florida, en einn aðalkosturinn við Florida er að þar finnur maður alls staðar einhverja góða jazzstöð í útvarpinu hvenær sem er sólarhringsins. Bara að maður gæti fengið eitthvað í námunda við það hér.

"The other side of Slumdog Millionaire"

The other side of Slumdog Millionaire

It seems that the Western world has some issues with the poverty shown in the subject film. I just came across this interesting article by KR Ravi and thought I should share it with you. :-)

Samfylkingarblogg -- verið að vinna í gagnvirkum vef

Þeir voru fljótir að svara mér hjá Samfylkingunni og segja mér að það sé:

í gangi vinna við nýjan vef Samfylkingarinnar þar sem hvers kyns gagnvirkni og þátttaka almennra félagsmanna og annarra áhugamanna um stjórnmál verður í fyrirrúmi. Stefnt er að því að sá vefur verði opnaður um aðra helgi.

Ég læt mig bara hlakka til. :-)

Samfylkingarblogg -- eða ekki...

Mig hefur oft langað til þess að sjá hvað hinn almenni Samfylkingarmaður hefur að segja í hinum lýðræðislegu og opnu stjórnmálasamtökum, Samfylkingunni. Þarna er þessi hnappur fyrir bloggið:
Bloggið!

En þar er ekkert blogg að finna, aðeins fjölda tengla á fyrirfólk Samfylkingarinnar, ýmist heimasíður eða bloggsíður.

Er þetta leiðin til opinnar umræðu? Gætum við ekki lært eitthvað af unga fólkinu hér?

Geir eykur enn á niðurlægingu sína

Geir vildi ná í Brown en fékk ekki samband.

Maður fær það á tilfinninguna að Geir hafi verið því fegnastur þegar Brown reyndist vera upptekinn (kannski var bara á tali?). Hann slapp þá við þetta erfiða símtal. Tölum þá bara við undirmanninn, Darling.

Að maður skuli vera að eyða tíma og kröftum í að blogga um svona mikla niðurlægingu. Maður ætti bara að gera eins og Geir og láta sem ekkert hafi gerst.

Sigurður ruddi

Maður getur stundum hlegið að sjálfum sér, hvað maður getur fengið út úr því sem maður skyndiles eða kastar augunum yfir. Ég var að kíkja á iGoogle desktoppinn minn og sá fyrst af öllu þetta: "Sigurður ruddi" og svo eitthvað meira. Upp í hugann kemur með það sama að einhver hafi verið að kalla einhvern Sigurð ónöfnum. En það var víst ekki málið. Þarna var vísun í frétt Mbl (eins og glögglega kemur fram) um að Sigurður heitinn Helgason hafi rutt lággjaldaflugfélögum braut. Sjá: "Sigurður ruddi lággjaldaflugfélögum braut".

Davíð segir "Geltu!" - Davíð og dularfulla bréfið

Merkileg framkoma Geirs H. Haarde í dag á Alþingi. Hann er kannski svolítið óvanur venjulegum þingstörfum hafandi verið ráðherra mestalla sína "alþingistíð". En augljóslega kom "leki" úr Seðlabankanum og Geir, eins og aðrir góðir Snatar, gelti eins og til stóð.

Dapurlegt að hann skuli ekki sjá hvernig Davið niðurlægir hann aftur og aftur. :-( Það er hins vegar skiljanlegra með stuttbuxnadrengina Sigurð Kára og Co.

"Jón Baldvin varpaði tímasprengju" - Undarleg skrif

Þessi athugasemd mín við blogggrein Björgvins Guðmundssonar er ekki komin inn eftir hálfan dag, þannig að ég birti hana hér:

Sæll Björgvin.

Þú hefðir átt að vera á fundinum. Þetta var ekki tímasprengja. Þetta var sprengja og hún sprakk strax.

Finnst þér virkilega að Ingibjörg hafi staðið sig vel? Ég studdi hana til formennsku í Samfylkingunni, en mér finnst hún hafa brugðist, annað hvort vegna linkindar við Geir eða vegna þess að hún sjálf áttaði sig ekki á alvarleika stöðunnar. Hún er í þeirri stöðu sem formaður að henni er trúað fyrir að gæta hagsmuna okkar, bæði Samfylkingarmanna almennt, kjósenda og landsins alls.

Ég varð þeirrar skoðunar -- reyndar nokkuð seint, finnst mér núna -- eða í lok nóvember sl. að eftirfarandi ættu að segja af sér:

• Seðlabankastjórar og bankaráð Seðlabankans;
• Forstöðumaður FME og jafnvel stjórn FME, þó svo að Jón Sig hafi setið stutt og sé varla um að kenna;
• Forsætisráðherra, fjármálaráðherra, utanríkisráðherra (vegna þess að hún er formaður Samfylkingarinnar) og Viðskiptaráðherra.

Sumir þessara áttu að segja af sér vegna þess að þeir áttu sök á málum beinlínis, en aðrir vegna þess að þeir höfðu sofið á verðinum. Miðað við það sem almenningur veit í dag, þá er það afskaplega dapurlegt að þeir sem höfðu miklu betri aðgang að öllum upplýsingum og hafði verið trúað fyrir hinum hæstu stöðum, skyldu ekki vera vakandi.

Það þarf líka að skapa traust innanlands og utan.

Uppskeran er heldur rýr miðað við þetta. Þú veist sjálfur hverjir hafa sagt af sér og hvejir hafa verið látnir fara og hverjum er verið að reyna að koma frá. Ingibjörg Sólrún á að hafa vit á að segja af sér eða alla vega að tilkynna að hún verði ekki í framboði til formennsku, eða taki sæti á næsta þingi.

Ég er að sjálfsögðu sammála þér að það sé fyrst og fremst Sjálfstæðisfl. og Framsóknarfl. (hinn gamli alla vega), sem bera pólitíska ábyrgð á málum, en hinir bera líka ábyrgð, sem sofna á verðinum.

Sprengjan er sprungin. Jón Baldvin var með lausnina fyrir 14 árum síðan, sem hefði komið í veg fyrir þetta alvarlega ástand. Þjóðin hafnaði honum þá, af því að hún kaus að trúa rógsherferð Sjálfstæðismanna og Framsóknarmanna (og fleiri, jafnvel Samfylkingarmanna).

Jón Baldvin er sá eini reynslubolti í pólitík, sem ég þekki, sem er algerlega frír við að hafa stungist af þessum svfnþorni, sem þjóðin virðist hafa verið stungin af. Hann var líka með lausnina: Inngöngu í ESB.

Ég segi: Jón Baldvin sem formann Samfylkingarinnar. Hann gerir sér grein fyrir stöðunni. Hann mun ekki láta menn komast upp með að sluxa við björgunarstörfin. Hann hefur reynsluna. Hann er eini kosturinn sem ég sé í stöðunni. Áður en hann kastaði þessari sprengju, var ég alvarlega að íhuga Framsóknarflokkinn, hvort endurnýjunin þar væri nægileg til þess að hann gæti komið til greina fyrir vonsvikinn krata.

Með vinsemd.

Böðvar Björgvinsson
krati síðan 1978.

Við þetta má bæta að Jón Baldvin setur stundum fram hluti til þess að fá viðbrögð við þeim eða að koma einhverju öðru af stað, þannig að ekki er svo sem víst að hann meini neitt með því í rauninni að hann ætli í framboð. Hann gæti hins vegar miklu frekar verið að knýja Ingibjörgu Sólrúnu til svara.

Týndir snillingar - Kristín Liljendahl

Það er eins og sumir hverfi einfaldlega af yfirborði jarðar eftir að hafa hlotið frægð. Einn slíkra er söngkonan Kristín Liljendahl, sem söng svo eftirminnilega "Ég skal mála allan heiminn, elsku mamma". Hvað varð eiginlega af henni? Mér þætti vænt um svör.

Einnig er spurning um höfunda lags og texta. Upplýsingum á Netinu ber ekki saman, þar sem tveir aðilar segja lagið sænskt (enginn höfundur) og textann eftir Hinrik Bjarnason, en einn að lagið sé eftir Hinrik Bjarnason og textinn eftir Iðunni Steinsdóttur.

Það vantar upplýsingar um svona hluti á heimsnetið. Og hananú!

Mogginn og Micro$oft

Finnst ykkur ekki merkilegt að það að einhver ætli að gera eitthvað skuli vera frétt, þegar sá sem aftur hefur náð einhverju stóru markmiði fær svona rétt að fljóta með?

Tækni & vísindi | mbl.is | 27.1.2009 | 12:09
Microsoft ætlar sér stóra hluti í netvafrabaráttunni

Það ætla líka fleiri, svo sem FireFox, Mozilla, Opera o. fl.

Svo er tilvísun í "Heimasíðu Microsoft", sem er í raun tengill inn á beta-útgáfu af IE8. Hann er sem sé rétt kominn í RC1 útgáfu!

Go with the mon(k)ey!

Smyrjaraliðið á Svertingsstöðum komið í gang

Það var við því að búast að Sjálfstæðismenn yndu illa því að fá ekki að vera með í ríkisstjórn. Þeim hefur alltaf líkað það illa. Þeir telja að þeir séu sjálfbornir til þess að stjórna landinu. Það þarf að passa svo margar stöður -- lykilstöður. Og nú eru þeir sem sé komnir í gang:

Innlent | Morgunblaðið | 28.1.2009 | 05:30 „Ótrúlega ómerkilegt“ af Samfylkingu Eftir Pétur Blöndal pebl@mbl.is

Ég hef stundum séð gott koma frá Pétri, en stundum fellur hann líka í Heimdallardíkið. Það virðist erfitt að komast upp úr því. Og hann byrjar af krafti. Reyndar svo miklum að það stendur ekki steinn yfir steini í umfjöllun hans, nema þá að þingmenn og ráðherra Sjálfstæðisflokksins séu heyrnarlausir, ólæsir og með öllu dómgreindarlausir -- sem ég vil helst ekki ætla þeim. Lítum á nokkur atriði.

Margt af því sem er á svonefndum aðgerðalista Samfylkingarinnar, sem birtur var í Morgunblaðinu í gær, höfðu sjálfstæðismenn raunar aldrei heyrt um, svo sem að færa niður veðstöðu lána og bæta réttarstöðu skuldara, bjargráðasjóð heimilanna og aðkomu auðmanna.

Öll þessi mál eru búin að vera í umræðunni síðan í haust. Sjálfstæðismenn eru þá að mati Péturs (eða heimildarmanna hans) heyrnarlausir og ólæsir eða jafnvel blindir upp til hópa.

Það sé til marks um að verið sé að slá ryki í augu fólks, að ekki sé á listanum að Samfylkingin hafi krafist þess að fá forsætisráðuneytið, „sem kom á daginn að var algjört aðalatriði og skilyrði fyrir hinu“.

Það hefur komið rækilega fram í fjölmiðlum að Samfylkingin krafðist breytinga í Seðlabankanum og að verkstjórn (orð sem Geir móðgaðist svo mjög yfir) yrði að komast í lag. Fyrst Geir þverskallaðist við þessum sjálfsögðu kröfum, þýddi þetta að það yrði að skipta um í brúnni. Geir og Solla eru bæði veik, sem kunnugt er, og þurfa að komast í smá frí þess vegna og flestir aðrir að fara í kosningaslag, þannig að Samfylkingunni (les: Sollu) kom til hugar að nýta mætti starfskrafta þess þingmanns sem mest þjóðarsátt er um og er að hætta á þingi til þess að stýra skútunni þessa síðustu metra. Hins vegar vitandi um hatur margra sjálfstæðismanna á "heilagri Jóhönnu" og því að þeir líta margir í raun niður á hana fyrir ýmissa hluta sakir, þá get ég svo sem sæst á að Solla hafi þarna kannski vísvitandi sett fram kröfu sem hún vissi að Sjálfstæðismenn myndu aldrei, ALDREI, ganga að. Solla vissi svo sem að það þýddi ekkert að eiga frekar við sjálfstæðismenn.

Í þriðja lagi um „svokallaða tiltekt“ í Seðlabankanum, þar sem Sjálfstæðisflokkurinn hafi fyrir löngu sagst tilbúinn í lagabreytingar, sem gætu leitt til breytinga á yfirstjórn Seðlabankans, en byggðust á tillögum frá erlendum sérfræðingum sem fengnir höfðu verið til að skoða skipulag Fjármálaeftirlitsins og hugsanlega sameiningu þess við Seðlabankann.

Hvað ætlaði Sjálfstæðisflokkurinn sér að hanga á þessu í langan tíma? Hvers vegna voru þessar áætlanir ekki komnar í gegn? Það er neyðarástand í þjóðfélaginu en sjálfstæðismönnum liggur ekkert á. Ekki frekar en alltaf.

Málið er það að sjálfstæðismenn hafa aldrei kunnað að vinna. Þeir hafa hangið á þingi að hætti breskra íhaldsmanna, sem finnst aðallega fínt að vera þarna og þetta er náttúrulega ágætur klúbbur, gott fæði og allt það.

Rifjum upp aðdraganda Viðeyjarstjórnarinnar. Aldrei komu sjálfstæðismenn undirbúnir til viðræðna. Jón Baldvin og Jón Sigurðsson voru alltaf tilbúnir með tillögur og varatillögur, enda varð stjórnarsamningurinn að mestu leyti upp úr stefnuskrá Alþýðuflokksins.

Sömu hluti er maður alltaf að reka sig á. Ég hef komist að þeirri niðurstöðu að sjálfstæðismenn (þingmenn og ráðherrar og aðrir "wannabe's") séu latir, óklárir í stjórnmálum og staðnaðir. Þegar ég segi óklárir í stjórnmálum, þá á ég við málefnavinnu, því að þeir ásamt framsóknarmönnum hafa reynst manna duglegastir við að koma sínum mönnum í lykilstöður í stjórnkerfinu, hlutur sem ætti ekki að meta nema 10% af mikilvægi stjórnmála. Hjá sjálfstæðismönnum virðist þetta vera öfugt: Málefni 10% stöðuveitingar 90%. Þeir minna svolítið á vinnubrögð í Austur-Evrópu: tala, tala, kannski framkvæma einhvern tíma seinna.

Og fjórða atriðið sneri að aðgerðum í þágu heimilanna, sem hefði áreiðanlega samist um.

Nákvæmlega: "...sem hefði áreiðanlega..." kannski og ef til vill. Er ekki neyðarástand í þjóðfélaginu?

Sjálfstæðisflokkurinn bætti við fimmta liðnum, aðgerðum í þágu atvinnulífsins til að sporna við atvinnuleysi.

Halló! Enginn heima? Það var talað um þetta strax í haust og allan tímann síðan! Les Pétur Blöndal ekki einu sinni Moggann?

Sjálfstæðismenn telja fullljóst að ekki hefði þurft að vera ágreiningur um þessi efnislegu atriði, heldur hafi verið settur á svið ágreiningur um forystuna í ríkisstjórninni.

Það var ekki ágreiningur um efnisleg atriði. Það sjá allir! Það var og er ágreiningur um vinnubrögð og þörf á aðgerðum.

Þetta er ein af fyrstu greinunum í mogganum og öðrum fjölmiðlum sem sjálfstæðismenn komast í í súrri baráttur þeirra til að sverta fyrrum samherja sinn og reyna að smyrja og nota smjörklípur. Þetta kunna sjálfstæðismenn manna best. Ég er að vona að þjóðin sjái í gegnum þá í þetta sinn.

Aðferðin er þekkt. Hún heitir FUD á ensku. "Fear, Uncertainty, Doubt" eða "ótti, óvissa, efi. Það er byrjað á að reyna að gera menn óttaslegna, síðan skapa óvissu, sem í framhaldinu veldur efa. Í þessu tilfelli efa um að andstæðingurinn sé að fara með rétt mál, efa um að hann sé hæfur til stjórnarsetu.

Höfum það bara á hreinu: Sjálfstæðisflokkurinn hefur margsannað sig að vera seinn til verka og seinn til hugsana, nema þegar þarf að koma gæðingum fyrir í kerfinu.

Eitt mega sjálfstæðismenn (og reyndar framsóknarmenn líka) eiga. Þeir virða kristni og kirkju í landinu. Þeir mættu samt læra meira af kristindómnum.

Kompásþátturinn lagður niður -- hvers vegna?

Í kastljósi RUV í gær kom Kristinn Hrafnsson fram og taldi að Kompásþátturinn hefði verið lagður niður til þess að sleppa við umfjöllun um lánveitingar Kaupþings til viðskiptajöfursins Robert Tchenguiz. Vísir.is bregst hart við í dag (sjá: Gömul frétt í Kastljósi) og kennir um hve dýr þátturinn sé.

Fyrst þessi kompásþáttur var tilbúinn til sýningar og allur kostnaður þegar til kominn, hvers vegna sá Stöð2 ekki ástæðu til þess að setja hann til sýningar? Er það ekki einmitt að henda peningum út um gluggann? Ég hefði haldið það. Og þá kemur spurningin með tvöföldum þunga: Hvers vegna var þátturinn lagður niður? Nákvæmlega þessi háttur á því að leggja þáttinn niður, að birta ekki tilbúinn þátt, vekur eðlilega mjög mikla tortryggni.

Ég hélt að 365 batteríið (hvað sem það heitir í dag og hvað sem það hét áður) hefði eingöngu tengst Glitni. Var það kannski misskilningur? Er eitthvað enn dularfyllra, sem tengist Kaupþingi? Eða áttu einhver samsvarandi viðskipti sér stað við Glitni eða tengd fyrirtæki? Eða er Kristinn Hrafnsson að fara með rangt mál?

Mér finnst allt í einu brýnt að fá svör við þessu.

Til hamingju, Björgvin!

mbl.is: Björgvin segir af sér og stjórnendur Fjármálaeftirlitsins hætta

Ég óska Björgvin G. Sigurðssyni til hamingju með þessa stóru ákvörðun. Það er tvöföld ástæða til hamingjuóska í hans garð að honum tókst að setja Framkvæmdastjóra FME af einnig. Varðandi stjórn FME, þá er það einnig skynsemismál að hún sagði af sér í kjölfarið, en einhvern veginn held ég að erfitt verði að manna stöðu Jóns Sigurðssonar. Hann hefur áreiðanlega gert það sem á hans valdi var til þess að bæta ástandið þar á bæ, en ég þekki ekki innviðina nægilega vel til þess að geta metið það. Ég hef á tilfinningunni að stjórn FME hafi í raun afskaplega lítið vald.

Þetta verður vonandi til þess að Árni Matt og seðlabankastjórn og bankaráð Seðlabankans segi af sér einnig. Það verður að ske.

Ef þetta gerist, þá ætti ríkisstjórnin að geta setið til kosninga í apríl eða maí. Vonandi verða þessir atburðir til þess að róa þjóðina ögn og til þess að bæta siðferði í stjórnmálum almennt.

"Íslands ógæfu verður allt að vopni" - veikindi ráðamanna

Það á ekki af þjóðinni að ganga. Ekki er nóg með að ein stærsta efnahagsblaðra sem þekkst hefur (hlutfallslega, að sjálfsögðu) hafi sprungið í andlitið á þjóðinni, heldur hafa bæði Ingibjörg Sólrún, formaður Samfylkingarinnar, og nú Geir Haarde, formaður Sjálfstæðisflokksins og forsætisráðherra, orðið fyrir alvarlegum heilsubresti.

Ég, eins og fleiri, hef gagnrýnt þau fyrir að víkja ekki úr starfi, en öll gagnrýni hverfur við svo alvarlegar fréttir af heilsu. Við höfum, mörg í þessu landi, beðið fyrir þjóðinni og ráðamönnum, en biðjum einnig nú fyrir heilsu þessara forystumanna og að þau sem hugsanlega koma í þeirra stað reynist vandanum vaxin.